Unitat d'Aran

Unitat d’Aran se considère un partit progressista, aranesista e de clares conviccions ena defensa des drets nacionaus d’Aran, atau coma ena afirmacion dera sua cultura pròpria e deth sòn estatus politic diferenciat en Catalonha.
Unitat d’Aran ei tanben un partit municipalista que considère es municipis part fonamentau dera division administrativa deth nòste país, en tot entener-les coma pèces claus deth procès de descentralizacion dera administracion autonomica e estatau.
Es objectius politics d’Unitat d’Aran son basadi ena volentat d’arténher ua societat mès justa e igualitària que permete er accès de toti es individus as drets basics tà ua vida digna, ei a díder, dera educacion, dera sanitat publica e dera igualtat d’oportunitats, sense qu’era apertienença a ua classe sociau determinada, n’era manca de recorsi economics sigue motiu de discriminacion sociau.
Unitat d’Aran cercarà un posicionament politic que li permete actuar enes ambits sociaus, economics, mieiambientaus e ath madeish temps, de mantier ua postura actiua en prorocès de desvolopament e aplicacion dera Lei d’Aran. Unitat d’Aran velharà tanben per un desvolopament racionau deth nòste territòri, tot susvelhant qu’eth procès de repartiment de riquesa sigue çò mès democratic possible.
Era conviccion e era volentat de participar ena construccion d’un projècte de progrès tà Catalonha an hèt que, dempús 1990, Unitat d’Aran e eth PSC agen convergit en un projècte comun qu’ a cristalizat ena formacion de listes conjuntes enes eleccions municipaus de 1999 damb ua formula de coalicion de partits.
Unitat d’Aran ratifique atau era sua voluntat de mantier un perfil politic pròpri que concrète era diferéncia d’un territòri damb cultura, lengua e identitat pròpia se ben aguesta organitsacion vò huger d’un localisme endogamic que l’impedisque participar ena vida política catalana, espanhòla o europèa.