Programa Vagalume

O Programa Vagalume é un proxecto das Irmás Oblatas e Cáritas Diocesana de Santiago. O centro está especializado en dar apoio a mulleres que viven en contextos de prostitución e/ou son obxecto de trata con fins de explotación sexual. En Vagalume ofrécese información e asesoramento totalmente gratuíto, confidencial e non discriminatorio.

Entre os obxectivos de Vagalume:
- Coñecer directamente a realidade da prostitución achegándonos para iso aos lugares onde se leva a cabo: clubes e pisos.
- Ser un lugar de referencia onde as mulleres e as crianzas ao seu cargo atopen apoio, información, orientación e poidan iniciar un proceso de recuperación.
- Mediar entre as mulleres e os distintos recursos.
- Favorecer a súa calidade de vida.
- Promover a súa autonomía.
- Identificar, acoller e acompañar ás mulleres obxecto de trata con fins de explotación sexual no proceso de recuperación persoal.
- Informar e sensibilizar á sociedade en xeral da situación das mulleres obxecto de explotación sexual e trata.
O traballo que desenvolve Vagalume pode dividirse en catro bloques:

CENTRO DE DÍA

A finalidade do centro de día é proporcionar á muller, que se atopane n contextos de prostitución e/ou son vítimas de trata con fins de explotación sexual, un lugar específico e especializado onde mellorar o seu benestar e calidade de vida de forma integral, social, persoal, xurídica, emocional, sanitaria e laboral. Os obxectivos son previr a exclusión social, derivada primordialmente, do contexto da prostitución e ofrecer opcións reais para que as mulleres que viven en contextos de prostitución poidan ter unha maior decisión sobre a súa vida.
Así, no centro de día ofrécese información, orientación, un itinerario formativo bolseiro, diferentes servizos que dan resposta especializada ás demandas das mulleres participantes. Tamén levan a cabo actuacións paliativas, nas que se trata de reducir dano e, noutros casos, de reducir o impacto das secuelas do exercicio da prostitución e da trata.
Ofréceselles ás mulleres un espazo de confianza e respecto onde as mulleres, en situación de gran vulnerabilidade social, poidan expresar libremente as súas dificultades e necesidades.
Realízanse entrevistas informativas e/ou asesoramento social, derivacións (realización de contacto e xestións para a atención por outras entidades) e acompañamentos sociais.
Asesoría xurídica: Ten como obxectivo dar resposta ás necesidades en canto a temas socio-xurídicos e informar sobre os dereitos a posibles vítimas de trata con fins de explotación sexual. Realízanse entrevistas e/ou consultas, acompañamentos xurídicos e sociais e seguimentos.
Atención psicolóxica: O seu principal obxectivo é traballar e acompañar á muller en todo o referente ao coidado e promoción da súa saúde; na dimensión emocional, física e sexual. Lévase a cabo unha entrevista inicial, un tratamento psicoterapéutico, orientación psicolóxica, intervención en casos de crises, seguimento e coordinación con outros servizos, elaboración de informes e asistencia a persoas obxecto de trata en xuízo.
Orientación socio-laboral: Os obxectivos que persegue este servizo son o de descubrir e potenciar capacidades e actitudes adecuadas, coñecer os recursos e estratexias para a procura activa de emprego, coñecer os dereitos laborais básicos e os tipos de contrato máis frecuentes, aprender a confeccionar un C.V. e expor como afrontar unha entrevista e por último, coñecer estratexias de toma de decisións e de resolución de conflitos. Par así potenciar a recuperación de hábitos persoais básicos, habilidades e ferramentas necesarias para iniciar un proceso formativo básico e unha procura activa de emprego a través de varios talleres.
Proxecto mellora da calidade de vida: O seu obxectivo é mellorar a calidade de vida no ámbito socio-sanitario a través do acompañamento e desenvolvemento dos diferentes talleres.
Talleres formativos e de recuperación persoal: O seu fin é o de potenciar a recuperación de hábitos persoais básicos, habilidades sociais e capacidades persoais necesarias para iniciar unha recuperación integral. É un proceso formativo básico a través de varios talleres de formación e recuperación co fin de realizar dun proxecto persoal.
Formación e promoción para a saúde: Engloba as actividades de formación en hábitos saudables e de prevención: información sobre E.T.S. (enfermidades de transmisión sexual), reparto de preservativos e orientación en métodos anticonceptivos.

CENTRO PSICOEDUCATIVO E FAMILIAR

Este centro está dirixido a familias que se atopan en dificultades coas súas fillas e fillos, co fin de mellorar o benestar da familia e de cada un dos membros que queiran:
- Mellorar o vínculo materno/paterno filial.
- Adquirir pautas educativas adaptadas ás necesidades das súas fillas/os.
- Axudar ás crianzas a descubrir e/ou desenvolver as súas potencialidades, capacidades e/ou habilidades.
- Actuar ante o fracaso escolar.
- Traballar e acompañar ás criaznas no seu proceso de recuperación emocional ante un trauma sufrido.
E ten como obxectivos:
- Apoiar ás familias en canto á educación dos seus fillos/as.
- Ser referente para as crianzas e as mozas/os en dificultade.
- Ser ponte para a integración social, educativa e cultural de cada neno/a e/ou adolescente.
Entre as accións que se levan a cabo no centro psicoeducativo e familiar destacan:
- Asesoramento familiar: Trátase de proporcionar intervención terapéutica específica que permita a todo o sistema familiar (nai, pai, fillo/a) facer os axustes necesarios para reducir conflitos e restablecer o bo funcionamento familiar.
- Proxecto "Vínculo": Ten como finalidade crear un espazo para restablecer e/ou mellorar o vínculo entre pais/nais e fillos/as cando estea deteriorado por algunha circunstancia específica; afastamento prolongado, situacións de tensión familiar continua, malos tratos, etc.
- Proxecto "Terapia de xogo": É un espazo onde o/a neno/a e/ou adolescente pode expresar as súas emocións (medo, ira, rabia...) dunha forma segura, así aprender a coñecerse, aceptarse e respectarse.
- Proxecto "Abrindo horizontes": A finalidade é abrir camiños a nenos/as e/ou adolescentes nos que predomina o fracaso escolar e os problemas de comportamento para que descubran ou melloren as súas potencialidades, capacidades e/ou habilidades. Todo iso realízase a través de: talleres de reforzo escolar, educativos e de habilidades persoais.

PISO DE ACOLLIDA

A finalidade deste piso é servir como residencia temporal e posibilitar un proceso de recuperación persoal para protexer, dar seguridade e apoio profesional á muller que vive en contextos de prostitución e pasa por unhas especiais dificultades que impiden a súa plena autonomía ; obstaculizando o seu camiño cara á integración socio-laboral como a aquelas que son vítimas de trata con fins de explotación sexual e necesitan un período de reflexión e recuperación persoal.
Os obxectivos son:
- Ser residencia temporal na cal, a muller conta co tempo necesario para a súa recuperación emocional e de reflexión.
- Potenciar os recursos persoais da muller para que poida afrontar situacións futuras de forma autónoma e capaz de elaborar un proxecto vital.
Algunhas das acción que se levan a cabo neste bloque de traballo son o empadroamento, tarxeta sanitaria, acompañamentos socio-sanitarios, orientación socio-laboral, elaboración dun plan individualizado de traballo (PIT), talleres de convivencia positiva (hábitos saudables, economía de fogar, aproveitamento do lecer e tempo libre) ou derivacións.

TRABALLO DE RÚA

Os obxectivos do traballo de rúa son a intervención directa no medio no que a muller exerce a prostitución para coñecer mellor cales son as súas necesidades, informar as mulleres sobre os seus dereitos sociais e sanitarios para que poidan acceder aos recursos, previr as ETS (enfermidades de transmisión sexual) a través da repartición de material profilácticoe converter Vagalume nun centro de referencia para as mulleres.